सेयर बजारमा दोहोरो अंकको वृद्धि

काठमाडौं। धितोपत्र कारोबार हुने साताको पहिलो दिन आइतबार सेयर बजारमा लगातारको गिरावटमा ब्रेक लागेको छ। बजार आज १७.९५ अंकले उकालो लागेको हो। योसँगै नेप्से परिसूचक २२५६.५७ को विन्दुमा उक्लिएको छ।

राम्रा र बलिया कम्पनीको सूचक सेन्सेटिभ इन्डेक्स पनि ३.८० अंकले बढेर ४३६.३५ को विन्दुमा पुगेको छ। कारोबार रकम सवा १ अर्ब रुपैयाँ बढीको भएको छ। आज नेप्से उपसमूहमा रहेका १३ वटा समूहमध्ये ११ वटामा हरियाली छाएको छ।

यो दिन एउटा समूहमा रातो पोतिएको छ भने एउटा समूह स्थिर रहेको छ। यो दिन वित्त समूह सर्वाधिक ३.३५ प्रतिशतले उकालो लागेको छ। विकास बैंक समूह २.८४ प्रतिशतले बढ्दा व्यापार समूहमा ०.२४ प्रतिशत, होटेल तथा पर्यटन समूहमा २.५ प्रतिशत, जलविद्युत समूहमा २.७१ प्रतिशत, निर्जीवन बीमा समूहमा ०.०९ प्रतिशत, उत्पादन तथा प्रशोधन समूहमा ०.२२ प्रतिशत, अन्य समूहमा २.११ प्रतिशत, जीवन बीमा समूहमा ०.३३ प्रतिशत, म्युचुअल फन्ड समूहमा ०.४६ प्रतिशत र लगानी समूहमा २.०५ प्रतिशतको बढोत्तरी भएको छ। आज बैंकिङ समूहमा ०.१७ प्रतिशतको गिरावट आएको छ भने लघुवित्त समूह स्थिर रहेको छ।

धेरै कारोबार गर्ने कम्पनीहरू

आज नेप्सेमा सूचीकृतमध्ये २३३ कम्पनीका ३३ लाख ४१ हजार २१४ कित्ता सेयर १ अर्ब ३२ करोड ६४ लाख २१ हजार ६७२ रुपैयाँमा किनबेच भएका छन्। यो दिन नागरिक लगानी कोषको सर्वाधिक ७ करोड ५३ लाख रुपैयाँ बढीको कारोबार भएको छ। हिमालयन डिस्टिलरीको ४ करोड ६० लाख रुपैयाँबराबरको नबिल बैंकको ४ करोड १५ लाख रुपैयाँ, एनआईसी एसिया बैंकको ३ करोड ६७ लाख रुपैयाँ, अरुण भ्याली हाइड्रोपावरको ३ करोड ५८ लाख रुपैयाँ, शिवम सिमेन्टको ३ करोड २७ लाख रुपैयाँ, एनआईसी एसिया लघुवित्तको संस्थापक सेयरको ३ करोड १९ लाख रुपैयाँ, एनएमबि बैंकको संस्थापक सेयरको २ करोड ६९ लाख रुपैयाँ, निफ्राको २ करोड ६२ लाख रुपैयाँ र छिमेक लघुवित्तको २ करोड ५५ लाख रुपैयाँ बढीको कारोबार भएको छ।

धेरै कमाउने र धेरै गुमाउने

यो दिन जाल्पा सामुदायिक लघुवित्तका सेयरधनीहरु मालामाल भएका छन्। यो लघुवित्तको सेयरभाउमा १० प्रतिशतको बढोत्तरीका साथ पोजिटिभ सर्किट लागेको छ। आज उन्नति सहकार्य लघुवित्तका सेयरधनीहरुले धेरै गुमाए। यो कम्पनीको सेयरभाउमा ५ प्रतिशतको हाराहारीमा गिरावट आएको छ।