काठमाडौं। नेकपा एमालेको जनवर्गीय संगठन राष्ट्रिय युवा संघले पेट्रोलियम पदार्थको अत्याधिक मूल्यबृद्धि भएको भन्दै दुई किलोमिटर सडकमा गाडी तथा मोटरसाईकल तानेर गुडाउँदै विरोध गरेको छ।
राष्ट्रिय युवा संघ नेपाल जिल्ला कमिटी भक्तपुरले आज आयोजना गरेको विरोध कार्यक्रममा संघका नेता तथा कार्यकर्ताले सूर्यविनायक घलातीदेखी सल्लाघारी हुँदै पुनः इम्पेरियल व्याङ्क्वैटसम्म गाडी तथा मोटरसाईकल ठेलेर गुडाउँदै सरकारको विरोध गरेका छन्।
पेट्रोलियम पदार्थको मूल्यबृद्धिका कारण जनताको दैनिक जीवन चलाउन कठिन अवस्था बनेको भन्दै संघले तत्काल मूल्यबृद्धि फिर्तालिन समेत आग्रह गरेको हो।
गृहमन्त्री तथा अर्थमन्त्रीको संलग्नता विना एयरपोर्टबाट एक क्वीटल सुन ल्याउन सम्भव नभएको भन्दै संघका नेता तथा कार्यकर्ता प्रचण्ड नेतृत्वको सरकार तस्करी भएको भन्दै राजिनामा मागेका छन्।
सयौंको उपस्थितीमा भएको सांकेतिक रुपमा गाडी तथा मोटरसाईकल तानेर गरिएको विरोधमा संघका नेता तथा कार्यकर्ताले सरकारविरुद्ध नारावाजी गरेका थिए । कार्यक्रममा मूल्यबृद्धि फिर्ता गर, महंगी नियन्त्रण गर, जनतामारा सरकार मुर्दावाद, प्रचण्ड तेरो पाराले, दुःख पाए साराले, गृहमन्त्री राजिनामा दे, अर्थमन्त्री राजिनामा दे, प्रधानमन्त्री राजिनामा दे, उच्चस्तरीय छानविन समिति गठन गर, राष्ट्रिय युवा संघ नेपाल जिन्दावादलगायतका नाराहरु लगाएका थिए ।
कार्यक्रममा नेकपा एमालेको पोलिटव्युरो सदस्य तथा पूर्वमन्त्री महेश बस्नेत, केन्द्रीय सदस्य तथा भक्तपुर इन्चार्ज कैलाश ढुंगेल, एमाले भक्तपुर जिल्ला अध्यक्ष बचन देउजा, संघका केन्द्रीय उपाध्यक्ष कृष्णहरी केसी, बागमती प्रदेशका सांसद किरण थापा, अनेमसंघरराष्ट्रिय युवा संघका केन्द्र तथा जिल्लाका नेता तथा कार्यकर्ताहरुको सहभागिता रहेको थियो।
केही दिन अघि नेपाल आयल निगमले पेट्रोलियम पदार्थको मूल्यबृद्धि गरी जनताको ढाड सेक्ने कार्य गरेको भन्दै संघले आपत्ती जनाएको छ।
प्रतिक्रिया