काठमाडौं। प्लेस्टिनी मूलकी अमेरिकी पत्रकार शिरीन अबू अकलेहको मृत्युको करिब चार महिनापछि इजरायलले एक रिपोर्टमा आफ्नो सैनिकमध्ये एकले गल्तीले उनको हत्या गरेको स्वीकार गरेको छ।
गत मे महिनामा वेस्ट बैंकमा छापा मारेको घटनाको रिपोर्टिङ गर्न पुगेकी अल–जजीराकी पत्रकार अकलेहमाथि गोली प्रहार भएको थियो। यद्यपि, सेनाका शीर्ष कानुनी अधिकारीहरूले हमलामा सामेल सैनिकविरुद्ध आपराधिक जाँच सुरु गर्न भने अस्वीकार गरेका छन्।
अकलेहको परिवारले इजरायलको स्वीकारोक्तिले आफूहरू ‘अचम्मित’ नभएको बताएको छ। इजरायले लगातार सत्यलाई लुकाउन र हत्याको जिम्मेवारी लिनबाट सधैँ बच्न खोजिरहेको उनीहरूको भनाइ छ।
गत मे ११ मा वेस्ट बैंकको जिनिनमा इजरायल सेनाले छापा मारेको समाचार कभर गर्न अकलेह त्यहाँ पुगेकी थिइन्। यस दौरान इजरायली सैनिक र प्यालेस्टिाइनका चरमपन्थीबीच झडप सुरु भएको थियो। हमलाको बेला अकलेहले ठुलो अक्षरमा ‘प्रेस’ लेखिएको ज्याकेट लगाएकी थिइन्।
उनको मृत्युको कारणबारे विभिन्न दाबी गरिएको थियो। प्रत्यक्षदर्शी र प्यालेस्टाइनका अधिकारीहरूले अकलेहलाई इजरायली सैनिकले गोली प्रहार गरेको दाबी गरेका थिए। यस दाबीलाई संयुक्त राष्ट्र संघ र अलग–अलग जाँच एजेन्जसीले समर्थन गरेका थिए। अमेरिकी समीक्षामा पनि इजरायलबाट नै सम्भवतः गोली प्रहार भएको बताइएको थियो।
अहिले इजरायलको सुरक्षा बलले आन्तरिक जाँच पुरा भएपछि आफ्नो सैनिक जवानले गल्तीले अकलेहमाथि गोली प्रहार गरेको स्वीकार गर्दै ती सैनिकलाई उनी पत्रकार भएको जानकारी नभएको दाबी गरेको छ।
प्रतिक्रिया